VATANIMIZNING YUKSAK MUKOFOTI BILAN TABRIKLAYMIZ !

Bosh sahifa / Axborot xizmati / Yangiliklar / Kundalik yangiliklar

04.03.2025 04.03.2025 220

Xalqaro xotin-qizlar kuni arafasida O‘zbekiston Respublikasi Prezidenti tomonidan “8-mart – Xalqaro xotin-qizlar kuni munosabati bilan mukofotlash to‘g‘risida”gi Farmon imzolandi. Ushbu Farmonga ko‘ra, mamlakatimizning 67 nafar fidokor va faol ayollari «Do‘stlik», «Sog‘lom avlod uchun» II darajali, «Salomatlik» II darajali ordenlari, shuningdek, «Sog‘lom turmush», «Sodiq xizmatlari uchun», «Kelajak bunyodkori», «Shuhrat» medallari bilan taqdirlandilar.

Faxr va quvonch bilan ta’kidlash joizki, mukofotlanganlar safida “O‘zmetkombinat” AJning ham fidoyi vakili bor. Zoldir prokatlash bo‘linmasi kran mashinisti Jamila Tursunqulova ko‘p yillik mehnati va fidoyiligi uchun «Do‘stlik» ordeni bilan mukofotlandi.

Mazkur Farmonga ko‘ra, ushbu yuksak mukofotlar mamlakatimiz ayollarini e’zozlash, ularning davlat va jamiyat hayotidagi o‘rnini yuksaltirish, uzoq yillar davomida samarali mehnat qilib, yuksak professionallik va mahorat namunasini ko‘rsatgani, tub islohotlarda faollik va tashabbuskorlik bilan qatnashgani, Yangi O‘zbekiston qurilishida namuna bo‘la olgani, xalqimiz farovonligini oshirishga, oilalarda sog‘lom ma’naviy muhitni mustahkamlashga, yosh avlodni Vatanga muhabbat va sadoqat ruhida tarbiyalashga qo‘shgan ulkan hissasi uchun berilmoqda.

Jamila Tursunqulovani ushbu yuksak Vatan mukofoti bilan chin yurakdan tabriklaymiz! Ularga kelgusidagi mehnat faoliyatlarida ulkan zafarlar, xalqimiz farovonligi va yurtimiz taraqqiyoti yo‘lida bardavom muvaffaqiyatlar tilaymiz!