SANOAT TARAQQIYOTINING RAMZI

Metallurgiya – O‘zbekiston iqtisodiyotining asosiy tarmoqlaridan biri bo‘lib, strategik sohalarni xomashyo bilan ta’minlaydi. Uni rivojlantirish yo‘lida muhim qadam sifatida “O‘zmetkombinat” AJda Quyuv-prokatlash majmuasi (QPM) qurilmoqda. Ushbu loyiha yiliga 1 million tonnadan ortiq issiq prokat ishlab chiqarish imkonini berib, importga bo‘lgan ehtiyojni kamaytiradi va eksport salohiyatini kengaytiradi.

Majmua Italiyaning "Danieli" kompaniyasining ilg‘or texnologiyalari bilan jihozlanmoqda. Elektrda po‘lat eritish pechi DSP-120, uzluksiz quyish mashinasi va prokatlash stani o‘rnatilishi yakunlanmoqda. Shuningdek, tunnel pechi, Germaniyaning "Hercules" silliqlash stanogi hamda xomashyo tushirish stansiyasi ishga tushirilmoqda. Xitoyning "Avik" kompaniyasi yetkazib bergan yangi kislorod stansiyasi uzluksiz texnik kislorod ta’minotini kafolatlaydi.

Loyihadan katta iqtisodiy samaralar kutilmoqda: kombinatda 1250 ta, bog‘liq tarmoqlarda esa 5000 ta yangi ish o‘rni yaratiladi. Metallurgiyaning rivojlanishi qurilish, mashinasozlik va transport sohalariga ham ijobiy ta’sir qiladi.

Ekologiya masalasiga alohida e’tibor qaratilgan: zamonaviy tozalash tizimlari chiqindilarni kamaytiradi, energiya tejovchi texnologiyalar resurslar sarfini optimallashtiradi.

QPM ishga tushirilishi – O‘zbekiston uchun strategik qadam. Bu mamlakat iqtisodiyotini mustahkamlab, metallurgiya sohasining raqobatbardoshligini oshiradi hamda sanoat taraqqiyotining ramziga aylanadi.