TAJRIBALI TEPLOVOZ MASHINISTI

 Poyezdning jo‘nash joyidan to belgilangan manziligacha xavfsiz va samarali harakatlanishini ta’minlash teplovoz mashinistining asosiy vazifasi hisoblanadi.
A’zam Yuldashev 2008 dan buyon Temir yo‘l xizmatida mehnat qilib kelmoqda. U dastlab, vagonda yuk tushiruvchi, 2011-yilda poyezd tuzuvchi, mashinist yordamchisi, 2019-yildan boshlab esa teplovoz mashinisti vazifasida ishlab kelmoqda. O‘tgan davr mobaynida ustozlari Mashrab Turonov, Axmadjon  To‘ychiyevlardan kasb sirlarini o‘rganib, hozirda tajribali teplovoz mashinistiga aylangan. Uning asosiy ish vazifasi tayyor mahsulotlarni vagonlarda Bekobod temir yo‘l stansiyasiga elitish va u yerdan kombinatning xom ashyosi hisoblangan temir-tersak parchalarini korxonaga olib kirishdan iborat. 

A. Yuldashev ish boshlashidan avval, teplovozga  xizmat ko‘rsatish bo‘yicha kichik texnik ishlarni bajaradi, masalan, mahsulotlarni jo‘natishdan oldin uning texnik holatini tekshirish, harakat jadvaliga rioya qilish, tezlikni boshqarish va zarur bo‘lganda oraliq to‘xtashlarni ham amalga oshiradi. Yana bir muhim jihat, teplovoz mashinisti dispetcherlar bilan yaqin hamkorlikda ishlaydi, yo‘llar, xavfsizlik qoidalari va me’yorlariga qat’iy rioya qiladi. 

Bir so‘z bilan aytganda, Temir yo‘l xizmati ahil jamoasi o‘zlariga yuklatilgan vazifalarga sidqidildan yondashib, yuklarni manzillariga betalofat yetkazishda reja-topshiriqlarni munosib bajarib kelishmoqda.