TOG'-KON SANOATI VA GEOLOGIYA VAZIRLIGI HAMDA “O‘ZMETKOMBINAT” RAHBARIYATI TOMONIDAN MUROJAATLAR KO‘RIB CHIQILDI

Bugun Tog‘-kon sanoati va geologiya vazirligi rahbariyati tomonidan yuridik hamda jismoniy shaxslar uchun sayyor qabul tashkil etildi.

Qabul davomida vazirning birinchi o‘rinbosari Feruza Hamidova, Bekobod shahar hokimi Nasrullo Boboyev hamda “O‘zmetkombinat” AJ boshqaruv raisi — bosh direktori Bahodir Abdullayev ishtirok etib, fuqarolarning murojaatlari va takliflarini atroflicha ko‘rib chiqdi.

Murojaatlar asosan tog‘-kon sanoati va geologiya sohasiga oid dolzarb masalalar, ishlab chiqarish jarayonlari, infratuzilmani rivojlantirish, ish o‘rinlari yaratish, ijtimoiy qo‘llab-quvvatlash hamda tadbirkorlik faoliyatini yanada kengaytirish bilan bog‘liq yo‘nalishlarni qamrab oldi. Har bir murojaat mas’ullar tomonidan batafsil o‘rganilib, ularning mazmun-mohiyatidan kelib chiqib aniq choralar belgilandi.

Qabul jarayonida ko‘tarilgan masalalarning bir qismi joyida hal etildi, qo‘shimcha o‘rganish talab etiladigan murojaatlar esa tegishli tashkilotlar kesimida nazoratga olinib, ularni qonunchilik doirasida hal etish bo‘yicha aniq muddatlar belgilandi.

Mazkur jarayon fuqarolar bilan ochiq muloqotni yo‘lga qo‘yish, ularning muammolarini bevosita tinglash hamda amaliy yechimlar ishlab chiqish orqali sohada olib borilayotgan islohotlar samaradorligini oshirishga xizmat qilmoqda.