BOSHQARUV RAISI-BOSH DIREKTOR MUROJAATI

Open index

Biz haqimizda

Korporativ boshqaruv

Investorlarga

Barqaror rivojlanish

Ishlab chiqarish

Axborot xizmati

Aloqalar

Bosh sahifa / Biz haqimizda / Korrupsiyaga qarshi kurash / Boshqaruv Raisi-bosh direktor murojaati

BOSHQARUV RAISI-BOSH DIREKTOR MUROJAATI

10.01.2024 07.08.2024 4966

BOSHQАRUV RАISI – BOSH DIREKTOR MUROJААTI

HАMKORLIKDА MАNFААTLАR TO‘QNАSHUVI VА KORRUPSIAGА CHEK QO‘YAMIZ!

Hurmatli hamkasblar! Аziz metallurglar!

O‘zbekiston metallurgiya kombinati rivojlangan ishlab chiqarish, transport va ijtimoiy infratuzilmaga ega bo‘lgan O‘zbekiston Respublikasining yetakchi og‘ir sanoat korxonalaridan biri. Kombinat erishilgan yutuqlar bilan kifoyalanib qolmay bugun jahon bozorida ham o‘zining mustahkam o‘rnini egallashga intilmoqda. Аmmo bunga xalaqit beradigan muammo mavjud. Bu korrupsiya va manfaatlar to‘qnashuvi muammosidir.

Maʼlumki, korrupsiya va manfaatlar to‘qnashuvi davlatga, jamiyatga katta zarar keltiradigan illatlardandir. Har bir sohadagi manfaatlar to‘qnashuvi va korrupsiya dunyo miqyosida hal etilishi lozim bo‘lgan global muammolardan biri. Ushbu illatlar har qanday davlat va jamiyatning siyosiy-iqtisodiy rivojlanishiga jiddiy putur yetkazadi, inson huquqi, erkinliklarining poymol bo‘lishiga olib keladi. Ular bor joyda sohalar rivojlanish o‘rniga, orqaga ketadi. Shu bois ularga qarshi kurash xalqaro ahamiyat kasb etib, jahon siyosatining muhim masalalari qatoridan joy olgan.

Joriy yilning 5-iyunida “Manfaatlar to‘qnashuvi to‘g‘risida”gi O‘zbekiston Respublikasi qonuni qabul qilindi. Ushbu huquqiy hujjat endilikda demokratik jamiyat kushandasi bo‘lgan korrupsiya illatlarining oldini olishga qaratilgani bilan ahamiyatli. Mazkur qonun manfaatlar to‘qnashuviga barham berish borasida muhim huquqiy asos bo‘ldi. Qonun bilan manfaatlar to‘qnashuvi tushunchasi, davlat xizmatchilarining majburiyatlari hamda uni tartibga solish bo‘yicha aniq mexanizmlar belgilandi.

Qonun davlat organlari va mahalliy davlat hokimiyati organlariga, davlat muassasalariga, davlat unitar korxonalariga, davlat maqsadli jamg‘armalariga, shuningdek, ustav fondida davlat ulushi 50 foiz miqdorda va undan ortiq bo‘lgan aksiyadorlik jamiyatlariga, ustav fondida davlat organlarining yoki boshqa tashkilotlarning ulushi jami 50 foiz miqdorda va undan ortiq bo‘lgan yuridik shaxslarga nisbatan tatbiq etiladi.

Qonunda davlat tashkiloti xodimlariga nisbatan manfaatlar to‘qnashuvining oldini olish bo‘yicha cheklovlar, manfaatlar to‘qnashuviga oid talablarni buzganlikning huquqiy oqibatlari, manfaatlar to‘qnashuviga yo‘l qo‘ygan holda qabul qilingan va tuzilgan bitimlarni sud tartibida haqiqiy emas, deb topish asoslari, manfaatlar to‘qnashuviga yo‘l qo‘yganlik uchun javobgarlik choralari belgilandi. Qonun manfaatlar to‘qnashuvini tartibga solishda davlat nazorati amalga oshirilishiga, davlat xizmatchilarining bevosita rahbarlari tomonidan manfaatlar to‘qnashuvi holatlari yuzaga kelganda tegishli choralar ko‘rilishiga, davlat xizmatchilari tomonidan sodir etilishi mumkin bo‘lgan korrupsiyaga oid huquqbuzarliklarning oldi olinishiga xizmat qiladi.

Kombinatimizda ham korrupsiya kabi manfaatlar to‘qnashuvining oldini olish o‘ta muhim. Bu muammo eʼtirof etilib¸ nazoratga olinmasa¸ u mansabdor shaxslar, ular qabul qilayotgan qarorlar orqali taraqqiyotimizga rahna soladi. Manfaatlar to‘qnashuvi korrupsiya yoki xizmat vazifalarini suiisteʼmol qilishni keltirib chiqaradi.

Ko‘p ming kishilik metallurglar jamoasi manfaatlar to‘qnashuvi bor joyda korrupsiya holatlari ko‘payishini yaxshi tushunadi. Zero, manfaatlar to‘qnashuvi aslida ko‘zga ko‘rinmaydigan, biroq eng xavfli illat hisoblanadi. Bunga qarshi keskin kurashilsa, yaʼni manfaatlar to‘qnashuviga chek qo‘yilsa, bu Kombinatimizning yanada tezroq rivojlanishiga xizmat qiladi.

Qadrli ishchi-xodimlar, hamkasblar!

Men sizlardan manfaatlar to‘qnashuvi va korrupsiyaning har qanday ko‘rinishlariga befarq bo‘lmasligingizni va unga qarshi kurashishda shaxsiy hissalaringizni qo‘shishga harakat qilishingizni so‘rayman.

Biz Kombinatda manfaatlar to‘qnashuvi va korrupsiyaning har qanday ko‘rinishiga murosasiz kurashamiz. Mansabdor shaxslar va xodimlarning shaxsan yoki vositachilik yo‘li bilan taraqqiyot va farovonlikning to‘sigʼi bo‘lgan bu illatlar bilan shug‘ullanishi qatʼiy taʼqiqlangan. Nafaqat bu illatlarga aralashgan, balki manfaatlar to‘qnashuvi haqida xabardor bo‘lib, unga eʼtiborsizlik qilganlar ham qonun oldida javobgarlikka tortiladi. Yaʼni qonunda manfaatlar to‘qnashuvi to‘gʼrisida xabar bermaganlik uchun javobgarlik belgilangan.

Sizlardan o‘z lavozim majburiyatlaringizni, xizmat vakolatlaringizni vijdonan bajarish va ularning bajarilishiga taʼsir ko‘rsatadigan yoki taʼsir ko‘rsatishi mumkin bo‘lgan shaxsiy manfaatlaringiz bilan bog‘liq har qanday harakatlardan o‘zingizni tiyishga chaqiraman. Biz Kombinatda lavozim majburiyatlarini yoki xizmat vakolatlarini bajarish chog‘ida manfaatlar to‘qnashuvi va korrupsiyaga olib keladigan yoki olib kelishi mumkin bo‘lgan shaxsiy manfaatdorlikka yo‘l qo‘ymasligimiz shart.

Korrupsiya va manffatlar to‘qnashuvining oldini olish choralarini ko‘rish, ularni keltirib chiqarishi mumkin bo‘lgan sabab va shart-sharoitlarni barvaqt aniqlash va bartaraf etish hamda ularga qarshi murosasiz muhitni shakllantirishga qaratilgan saʼy-harakatlarimizni Sizlar bilan hamkorlikda izchil davom ettiramiz.

Bu illatlar davlat va jamiyatimiz kabi Kombinatimiz manfaatlariga zarar yetkazish jihatidan ijtimoiy xavfliligi ancha yuqori bo‘lgan holatlarni keltirib chiqaradi. Kombinat va xalqimiz manfaatlariga xizmat qilish barchamizning asosiy vazifamizdir. Shunday ekan mansabdor shaxslardan o‘z vazifalarini adolatli va xolis bajarishlarini kutamiz.

“O‘zmetkombinat” АJ Boshqaruvi raisi – Bosh direktor

Rashid Xusanovich Pirmatov

		5.00 (5 ovoz)

	+998 70 214-14-23
	+998 70 214-13-78

	+99 890 902 71 02
	+99 870 214 16 94