YANGI BOSHQARUV RAISI – BOSH DIREKTOR TAYINLANDI

Bosh sahifa / Axborot xizmati / Yangiliklar / Kundalik yangiliklar

14.08.2025 14.08.2025 244

“O‘zmetkombinat” AJ Ijroiya apparatining majlislar zalida O‘zbekiston Respublikasi Vazirlar Mahkamasi, Tog‘-kon sanoati va geologiya vazirligi vakillari, korxona rahbarlari, bosh mutaxassislar va bo‘linma boshliqlari ishtirokida kengaytirilgan yig‘ilish bo‘lib o‘tdi.

Yig‘ilishni O‘zbekiston Tog‘-kon sanoati va geologiya vaziri Bobir Islomov olib bordi. U o‘z so‘zida metallurgiya sanoatidagi ishlarning bugungi holati, kombinatni xomashyo bilan ta’minlash masalalari va uni rivojlantirish rejalariga alohida e’tibor qaratdi.
Tadbirda yirik tadbirkor, tarkibida 20 dan ortiq korxonani birlashtirgan “BA Holding” ta’sischisi, va "Mehnat Shuhrati" ordeni sohibi Bahodir Tojimirzaevich Abdullayev “O‘zmetkombinat” AJ Boshqaruvi raisi – Bosh direktor vazifasini bajaruvchi etib tayinlangani e’lon qilindi.
Bahodir Abdullayev o‘z so‘zida O‘zbekiston Respublikasi Prezidentining ishonchi va kombinat jamoasining samimiy qabuli uchun minnatdorchilik bildirdi. U “O‘zmetkombinat” AJ ulkan salohiyat va salmoqli yutuqlarga ega ekanligini, birgalikdagi sa’y-harakatlar orqaligina oldinda turgan vazifalarni muvaffaqiyatli hal etish va korxona rivojiga salmoqli hissa qo‘shish mumkinligini ta’kidlab o‘tdi.
– Biz kombinatning ishonch bilan rivojlanishi, sohadagi mavqeini mustahkamlashi va yangi cho‘qqilarni zabt etishi uchun birgalikda ishlaymiz", – dedi.
Uchrashuv yakunida yig‘ilish ishtirokchilari yangi rahbar boshchiligida “O‘zmetkombinat” AJ O‘zbekistonning qora metallurgiyasi sohasida o‘z mavqeini mustahkamlashda, zamonaviy texnologiyalarni joriy etishda va ichki va tashqi bozorda mahsulot raqobatbardoshligini oshirishda muvaffaqiyatlarga erishishiga ishonch bildirdilar.