O‘Z DAVRINING MASHHUR PO‘LAT ERITUVCHISI

Bosh sahifa / Biz haqimizda / Bizning faxrimiz

02.05.2025 02.05.2025 256

Mamajon Yodgorov mamlakatda o‘z davrining mashhur po‘lat erituvchilaridan biri bo‘lgan. Otaxon mehnatda erishgan yutuqlari uchun ikki marta orden bilan mukofotlangan. O‘sha davrning nufuzli markaziy organlari a’zosi, eng e’tiborli anjumanlar delegati bo‘lgan.

1982-yil O‘zbekiston metallurgiya zavodi tomonidan o‘sha davrdagi mamlakatning eng zo‘r yengil mashinasi bo‘lgan “Volga” bilan mukofotlangan.

Mamajon Yodgorov bir yoshligida otasi urushga ketib 1942-yilda dom-daraksiz ketgan. U yolg‘iz farzand sifatida onasining yaqin dastiyori bo‘lgan. Shuning uchun ham yoshlikdan mehnatdan qochmaydigan, har qanday ishni do‘ndirib tashlaydigan inson bo‘lib voyaga yetgan. O‘quvchilik davrida metallurgiya sohasiga qiziqib qolgan. Shuning uchun ham 1959-yil o‘rta maktabni tugatganidan so‘ng Bekobod kasb-hunar bilim yurtiga o‘qishga kiradi. Oradan ikki yil o‘tib o‘qishni bitirganidan so‘ng O‘zbekiston metallurgiya zavodining Prokat sexiga – tunika ishlab-chiqarish uchastkasiga ishga qabul qilinadi. Dastlab valsalovchi yordamchisi bo‘lib ish boshlaydi.

– O‘sha paytlarda Ismoil aka Madaminov Prokat sexida usta bo‘lgan, meni o‘zining brigadasiga ishga chaqirib olgan edi. Bu kishi mening ustozim bo‘lgan, – deb eslaydi Mamajon ota.

Ustozi uni Bekobod shahridagi og‘ir sanoat texnikumining kechki bo‘limiga o‘qishga kirishga tavsiya etadi. Texnikumga o‘qishga kirganidan so‘ng ish vaqti boshlanguncha yoki ishdan keyin darsga qatnab, ham o‘qib, ham ishlaydi. 1966-yil po‘lat erituvchi mutaxassisligi bo‘yicha diplom oladi.

Ustozi “O‘qishni bitirgan bo‘lsang, po‘lat quyuvchilikka o‘tasan” deb o‘sha yillari Marten sexi boshlig‘i bo‘lgan Rixsivoy Yusupovning oldiga olib boradi. Shundan so‘ng M. Yodgorov po‘lat erituvchi yordamchisi bo‘lib ish boshlagan. 1969-yildan boshlab esa mustaqil po‘lat erituvchi bo‘lib ko‘p yillar mehnat qildi.

Chehrasidan nur, aql-zakovat taralib turgan, og‘ir-vazmin, mulohazali bu otaxon o‘zi haqida shunday deydi: “30 yil bekobodlik metallurglar jamoasida ishladim. Og‘ir ishda yuqori haroratda ishlaganim uchun 1991-yil 50 yoshimda pensiyaga chiqdim. Pensiyadan keyin yana 4 yil – 1995-yilgacha zavodda ishladim. Shundan so‘ng dehqonchilik bilan shug‘ullandim”.

– 1972-yilda Rossiyaning Cherepevskiy zavodida metall eritish tanlovida qatnashganimda “Men O‘zbekistondan keldim, O‘zbekistonda metall zavodi bor”, – desam, ular hayron bo‘lishib, “O‘zbekiston qaerda”, – deb so‘rashgan. Allohga shukr mustaqilligimiz sharofati bilan yurtimizni butun dunyo tanidi, tan oldi, – deydi 84 yoshli otaxon.

M. Yodgorov 1978-yilda Ukrainaning Zaporoje zavodida metall eritish tanlovlarida ham qatnashgan. Bu tanlovlarda u zavodimiz sharafini munosib himoya qilgan.

– Meni 1982-yil zavod tomonidan o‘sha davrdagi mamlakatning eng zo‘r yengil mashinasi bo‘lgan “Volga” bilan mukofotlandim. Allohga shukur, halol mehnatim bilan hamma narsaga erishdim. Mening shu darajaga yetib kelishimda to‘g‘ri yo‘l ko‘rsatgan ustozim Ismoil aka Madaminovni ham hanuz hurmat bilan eslayman. Shuningdek, yana Ochilov Ravshan aka, Bo‘ron aka kabi sofdil, mehribon insonlarning maslahatlarini to‘g‘ri qabul qilib, mehnatda yaxshi natijlarga erishganman. Bu insonlar juda mehr-oqibatli bo‘lganliklarini, doimo yordam berganliklarini o‘ylab, ular haqiga duolar qilaman. Bizning xalqimizdek mehr-oqibatli, insof-diyonatli millat bo‘lmasa kerak.

Endilikda Mamajon Yodgorov piru-badavlat otaxonlardan biri. Farzandlari, nabiralari, shogirdlari ardog‘ida keksalik gashtini surib umrguzaronlik qilmoqda.

		5.00 (10 ovoz)

Biz haqimizda

Korporativ boshqaruv

Investorlarga

Atrof-muhit va ISTB

Ishlab chiqarish

Axborot xizmati

Aloqalar

5.00